पुणे : धायरीतील श्रीराम वसाहत मित्रमंडळाच्या वतीने नुकतेच आरोग्य तपासणी शिबिर आणि रक्तदान शिबिराचे आयोजन करण्यात आले होते. आरोग्य शिबिराचा २०० जणांनी लाभ घेतला, तर रक्तदान शिबिरात ४५ जणांनी रक्तदान केले. मंडळाचे संस्थापक-अध्यक्ष सुनील शेळके यांनी ही माहिती दिली.
धायरीतील सिल्व्हर बर्च हॉस्पिटल आणि दीनानाथ मंगेशकर हॉस्पिटल अँड रिसर्च सेंटर यांच्या सौजन्याने हे शिबिर आयोजित करण्यात आले होते. शिबिरादरम्यान रक्तदाब, ईसीजी, मधुमेह तपासणी करण्यात आली. तसेच तज्ज्ञ डॉक्टरांकडून आरोग्य तपासणी करून मार्गदर्शन आणि सल्ला देण्यात आला.
या उपक्रमात मंडळाचे राजेंद्र मारणे (संस्थापक सचिव), राजेंद्र ओझरकर (संस्थापक खजिनदार), कैलास पजगाडे (संस्थापक कार्याध्यक्ष), विक्रम शेळके आणि कार्यकर्ते यांनी सहकार्य केले.
श्रीराम वसाहत मित्रमंडळाच्या वतीने दर वर्षी धार्मिक, सामाजिक, शैक्षणिक व सांस्कृतिक कार्यक्रमांचे आयोजन केले जाते. यंदा गणेशोत्सवासाठी येणारा इतर खर्च टाळून जमा झालेल्या लोकवर्गणीतून कोल्हापूर आणि सांगली येथील पूरग्रस्त विद्यार्थ्यांना शालेय साहित्य, तसेच पूरग्रस्त बांधवांना जीवनावश्यक वस्तू देण्यात आल्या.
